Kumekucha mbio za Karatu 2015

MSIMU mwingine wa tamasha la michezo la Karatu umewadia, ambapo mwaka huu kilele chake kinatarajia kuwa, Desemba 19 katika viwanja vya Mazingira Bora mjini humo. Ni msimu wa michezo wa mwisho wa mwaka, ambapo hufanyika tamasha la aina yake linahusisha michezo kibao na hivyo kutofautisha na mashindano au matamasha mengine.

Tamasha la Karatu pamoja na kushirikisha michezo zaidi ya mmoja, lakini mchezo wa riadha ambao hufanyika siku ya kilele cha tamasha hilo ndio huwa na msisimko mkubwa. Mbali na riadha, michezo mingine inayoshindaniwa katika tamasha hilo la kila mwaka ni pamoja na mbio za baiskeli ambazo ni za kilometa 60, mpira wa wavu, soka huku kwaya na ngoma kwa ajili ya kutumbuiza.

Mchezo wa riadha Mchezo wa riadha umekuwa na msisimko wa aina yake kwa kushirikisha wanariadha kibao nyota nchini, ambao wamekuwa wakifanya vizuri katika mashindano mbalimbali ya kitaifa na kimataifa. Pia riadha imekuwa maarufu sana kwani ndio mchezo ambao umemwezesha Filbert Bayi kuvunja rekodi ya dunia ya mbio za meta 1500. Bayi ndiye mwanzilishi na mwandaaji wa mbio hizo, ambazo zimekuwa zikidhaminiwa na Kamati ya Kimataifa ya Olimpiki (IOC) kupitia Kamati ya Olimpiki Tanzania (TOC).

Kingine kinachoufanya mchezo wa riadha kuwa maarufu zaidi katika michezo inayoshindaniwa katika tamasha hilo la michezo la Karatu ni ‘kuwatoa’ kiuchumi vijana wa eneo hilo la sehemu ya mkoa wa Arusha. Mbali na mbio za kilometa 10 ambazo huwashirikisha wanaumue, pia kutakuwa na mbio za kilometa tano na zile za kilometa 2.5, ambazo huwashirikisha wanawake na watoto wa shule za msingi.

Nyota wa riadha Awali, riadha ndio ulikuwa mchezo pekee ambao ulishiriki katika tamasha hilo na lengo kubwa likiwa ni kuibua na kuendeleza vipaji vya wanariadha chipukizi mkoani Arusha na hasa Karatu na vitongoji vyake. Vijana wengi wamejitokeza kufanya mazoezi na baadaye kushiriki mbio hizo za Karatu, ambazo zimekuwa na msisimko mkubwa kila mwishoni mwa mwaka.

Baadhi ya nyota ambao wamekuwa wakishiriki mbio hizo ni pamoja na akina Dickson Marwa, Fabian Joseph, Fabiola William, Ismail Juma, Mary Naali, Marco Joseph na wengine wengi. Mwaka huu pia zinatarajiwa sura mpya za riadha katika mashindano ya kilometa tano za 10, ambapo tayari baadhi yao wameshathibitisha kushiriki. Mbio za baiskeli Mbio za baiskeli za kilometa 60 ni mchezo mwingine ambao umekuwa na msisimko wa aina yake kwa kushirikisha waendeshaji wa baiskeli za kawaida na zile za mashindano.

Katika mashindano haya kwa muda miaka mingi mwendesha baiskeli Fabian Lucas wa Manyara ndiye alikuwa akishinda mbio hizo kabla ya kushirikisha baiskeli za mashindano. Lucas amekuwa akishiriki kwa kutumia baiskeli ya kawaida kabisa lakini amekuwa akiwatoa jasho wale wenye baiskeli za mashindano kutoka Arusha.

Mpira wa Miguu Mpira wa miguu pia ni sehemu ya tamasha hilo la Karatu na timu zinaanza kuchuana mapema katika mchujo ili kupata zile zitakazocheza fainali, ambayo mwaka huu itafanyika Desemba 18, siku moja kabla ya kilele, ambacho ni Desemba 19. Timu hucheza katika kata, tarafa na baadae wilaya kabla ya mbili kukutana katika fainali na mshindi kupatikana. Washindi wa soka mbali na kupata fedha taslimu wamekuwa pia wakipata vifaa vya mchezo huo kama mipira, jezi, nyavu na vitu vingine.

Mpira wa wavu Mchezo huu nao umekuwa ukivutio kikubwa kwa timu, ambazo zimekuwa zikicheza chini ya usimamizi wa Chama cha Mpira wa Wavu (Tava). Pia washindi wamekuwa wakipata vifaa vya mchezo huo kama nyavu, mipira na vitu vingine. Ngoma na kwaya Huko nyuma ngoma na kwaya ilikuwa sehemu nyingine ya mashindano lakini sasa vikundi hivyo hushiriki kwa ajili ya kutumbuiza, lakini navyo vinapewa zawadi.

Vikundi hivi vimekuwa vikitoa ujumbe mzito kwa vijana hasa kuhusu hatari za gonjwa hatari la ukimwi pamoja na mambo mengine kama kuwataka vijana kushiriki michezo. Tayari wachezaji na timu zimeanza maandalizi kabambe kwa ajili ya tamasha hilo la michezo la Karatu 2015.