Halmashauri zisizodhibiti ujenzi holela kukiona

SERIKALI imewatangazia kiama viongozi wa halmashauri za wilaya watakaozembea na kuwaachia wananchi wavamie maeneo yasiyo rasmi na kujenga bila kuwachukulia hatua, kuwa kuanzia sasa viongozi hao ndio watakaowajibika na kulipa fidia.

Agizo hilo lilitolewa bungeni Dodoma jana na Naibu Waziri wa Ardhi, Nyumba na Maendeleo ya Makazi Angelina Mabula, wakati akijibu swali la Mbunge wa Mwingwi, Juma Kombo Hamadi (CUF).

Katika swali lake la nyongeza mbunge huyo alitaka kufahamu ni kwa nini serikali imekuwa ikiwaachia wananchi wajenge katika maeneo yasiyo rasmi na kuwaacha waishi kwa muda mrefu ndipo wawabomolee.

“Hivi hamuoni kama huu ni uonevu? Kwanini msiwazuie tangu wakianza kujenga? Alihoji. Akijibu swali hilo, Mabula alikiri kuwa tatizo hilo limekuwa likisababishwa na halmashauri nyingi ambazo zimekuwa zikiweka alama ya zuio kwenye nyumba lakini baadaye hazifuatilii maendeleo ya eneo husika.

“Si kweli kwamba tunawaacha wananchi wanaendelea kujenga bila kuzuia, tatizo ni kwenye halmashauri zetu, wanaweka katika maeneo alama ya X alafu wanaendelea kwingine, bila kufuatilia walipopita, unakuta mtu ameshajenga,” alisisitiza.

Alisema kwa sasa serikali imejipanga kudhibiti hali hiyo ambapo kiongozi yeyote wa halmashauri atakayebainika kushuhudia ujenzi ukifanyika mpaka kukamilika katika eneo lisilo rasmi, yeye ndiye atakayechukuliwa hatua.

Alisema badala ya sasa ya mwananchi kuadhibiwa kwa kubomolewa na kutolipwa fidia kwa kujenga eneo lisilo rasmi na hatarishi, kiongozi huyo ndiye atakawajibika kwa kuchukuliwa hatua za kisheria lakini pia kulipa fidia kwa mwananchi husika.

“Naomba nitoe rai kupitia Bunge hili tukufu, niziombe halmashauri zote kufuatilia kwa kina na kuwachukulia hatua wale wote wanaojenga maeneo yasiyo rasmi mapema kabla ujenzi haujakamilika au kuanza kuishi kwenye nyumba hizo,”alisisitiza.

Mabula alisema katika kushughulikia kikamilifu suala hilo, Serikali imeanza kutoa ramani ili wananchi kupitia halmashauri zao waweze kujua ni maeneo gani ya wazi na wapi ni eneo lenye zuio. Alisema mkakati huo wameamua kuwatumia viongozi wa mtaa ili iwe rahisi kwao kudhibiti ujenzi wowote katika maeneo yasiyo rasmi kwa ujenzi na hatarishi kwa maisha yao.