Mwinyi ataka Watanzania kuchangamkia masomo KIU

RAIS mstaafu wa Awamu ya Pili ambaye pia ni Mkuu wa Chuo Kikuu cha Kimataifa cha Kampala (KIU) kilichopo Gongo la Mboto, Dar es Salaam, Ali Hassan Mwinyi ametoa mwito kwa watanzania kujiunga na chuo hicho ili kunufaika na elimu yake.

Alitoa mwito huo mwishoni mwa wiki wakati wa mahafali ya tatu ya chuo hicho ambapo wahitimu wa ngazi mbalimbali ikiwamo shahada, stashahada na cheti walitunukiwa vyeti.

Alisema kutokana na ufanisi wa elimu itolewayo chuoni hapo, ni dhahiri Watanzania wakijiunga nacho watajifunza mambo yatakayowawezesha kulimudu soko la ajira kwa kujiajiri au kuajiriwa.

Aliwapongeza wawekezaji katika chuo hicho na pia aliitaka serikali kuhakikisha kuwa inawasaidia wawekezaji hao katika kutanua zaidi wigo wa huduma zao. Makamu Mkuu wa chuo hicho, Profesa Mohammed Ndaula alisema chuo kimejipanga kuhakikisha kinakabiliana na ushindani katika sekta ya elimu.

Alisema kwa sasa chuo kimeshapata leseni ya kujiendesha nchini badala ya kuwa Chuo Kikuu kishiriki cha Chuo Kikuu cha Kampala kilichopo nchini Uganda.