Mbegu za viinitete zapingwa Moro

TANDAO wa Vikundi vya Wakulima Tanzania (MVIWATA) umepinga matumizi ya mbegu za viinitete (GMOs), kwa wakulima nchini wakidai kuwa si mahitaji yao bali ni biashara ya makampuni makubwa ya mbegu duniani yanayojaribu kuangalia soko la bidhaa zao.

Mwenyekiti wa Taifa wa Mviwata, Veronica Sophu, alisema hayo juzi kwa niaba ya wakulima wadogo wakati wa mjadala juu ya sera za kilimo na chakula ulioandaliwa na Mviwata.

Alisema mbegu hizo zenye viinitete ambazo zimeanza kutumika kwa baadhi ya nchi za Afrika kwa sasa zimeleta athari ya uzalishaji na kusababisha kujitokeza kwa magonjwa ya mazao ambayo ni vigumu kupata dawa.

“Sisi tukiwa wakulima wadogo nchini hatupo tayari kuzitumia mbegu hizi, na badala yake tunaitaka serikali ikae tena na wakulima na wadau wengine ili kuangalia changamoto halisi zinazomkabili mkulima na si mbegu za GMO,” alisema.

Sophu alisema wakulima wanakabiliwa na changamoto nyingi ikiwemo ukosefu wa miundombinu ya kilimo na kibiashara na kuiomba serikali kukaa na wakulima ili kuangalia namna ya kumaliza matatizo yao yakiwemo ya masoko na mazingira mazuri ya kiuzalishaji na si mbegu hizo.

Mlezi wa Mviwata, Stephen Mashishanga alisema wakulima wenyewe wanapaswa kuungana na kuwa kitu kimoja ili kupaza sauti zao kwa ajili ya kuzikataa sheria ambazo zinawakandamiza kwa vile hakuna mtu wa kuwasemea.

Mashishanga ambaye pia aliwahi kuwa mkuu wa mkoa wa Morogoro, alisema kutokana na wakulima kupinga matumizi ya mbegu za viini tete anaamini serikali iliyopo madarakani ya awamu ya tano itasikia kilio cha wakulima na itawawekea mazingira mazuri yatakayokuwa chachu kuongeza uzalishaji kwa kutumia mbegu zilizozoeleka na wakulima wengi nchini.

Akiwasilisha mada katika mjadala huo wa vyakula na mimea iliyobadilishwa vinasaba, Mshauri wa kitengo cha huduma za kisheria katika Ofisi ya Makamu wa Rais, Isakwisa Mwamukonda alisema tayari serikali imesaini makubaliano ya kutumia teknolojia hiyo ya GMO kwa ajili ya masuala ya tafiti.

Pamoja na kusaini makubaliano hayo, serikali imeweka masharti ya matumizi ya GMO kwa kuzifanyia vipimo vya kiutafiti kuona zinazofaa au zisizofaa na imekuwa ikitoa vibali kwa kuzingatia masharti yatokanayo na matokeo ya vipimo vya utafiti.

Mwamukonda alisema suala la kutumia GMO limebaki kwa mtu mmoja mmoja na serikali haimlazimishi mtu isipokuwa jukumu lake kuu ni kusimamia sheria na kuangalia masharti yaliyowekwa yanazingatiwa.

Kwa mujibu wa mshauri huyo wa kitengo cha huduma za Kisheria Ofisi ya Makamu wa Rais, mpaka sasa hakuna kibali kilichotolewa nchini na serikali kwa ajili matumizi ya mbegu zinazozalishwa kwa kutumia viinitete.