'Mapambano ya ufisadi yanaipa heshima CCM'

MBUNGE wa Korogwe Vijijini, Stephen Ngonyani (CCM), amesema juhudi za Rais Dk John Magufuli za kudhibiti wakwepa kodi zinakipa heshima kubwa chama chao katika mapambano dhidi ya ufisadi.

Akizungumza Dar es Salaam jana, mbunge huyo ambaye anajulikana kwa jina la ‘Profesa Maji Marefu’, alisema kasi hiyo ya rais imewasaidia pia majimboni kuhakikisha mambo yanakwenda na wananchi wanapata huduma.

“Heshima ya Tanzania ipo juu kimataifa, amewadhibiti mafisadi, zamani tulikuwa tunaambiwa wimbo wa mafisadi, lakini sasa wimbo ni Hapa Kazi Tu, jimboni kwangu mambo mazuri sana, ” alisema Ngonyani.

Wakati huo huo, mbunge huyo alikana taarifa zilizochapishwa na baadhi ya vyombo vya habari kuwa gari lake halijalipiwa kodi. Alisema taarifa hizo zina nia ya kumchonganisha na wapiga kura wake.

“Nimeshtushwa na kusikitishwa sana na gazeti moja la kila wiki, limetoa habari kuwa gari yangu mpya aina ya Toyota Land Cruiser V8 ‘Super Charger’ lipo mtaani likiwa halijalipiwa kodi.

“Nasema nimelipia kodi ya Sh milioni 69.307, bima Sh milioni 8.5, nimelipia Sh milioni tano kwa ajili ya kuandikwa jina langu la Profesa Majimarefu,” alisema.

Alifafanua, “Gharama ya gari hii ni Sh milioni 173.612, ukijumlisha na hizo kodi zinazidi Sh milioni 240.”