DIMBWI LA MAHABA: Kwanini wapenzi huumiza wenza wao?

MPENZI ambaye anampenda kwa dhati mwenza wake, si rahisi kufanya jambo la kumuumiza. Mapenzi mara zote humtaka mtu kuonesha anamjali mwenza wake kwa kila kitu zikiwamo hisia zake.

Ndio maana wapenzi wengi hujikuta wakijitahidi kufanya mambo yasiyogusa vibaya hisia za wenza wao kama vile kuhakikisha mara zote wana furaha, wanasaidiana kutimiza ndoto zao na hata kusaidiana pindi wanapokumbwa na matatizo.

Kama una mpenzi au mwenza ambaye hafanyi angalau jambo moja hapo juu, kwa kweli uhusiano huo hautakuwa na kitu chochote kinachoitwa upendo, kwa kuwa maana halisi ya mapenzi inaendana na sifa hizo hapo juu.

Wapo wenza wengi tu katika maisha yetu, wanafanyiana yote hayo yaani wanapendana na kuthaminiana kwa kila kitu na hawana wasiwasi na uhusiano wao, kwani kwa kufanyiana hivyo ni kinga thabiti ya kutovunjika kirahisi kwa pendo lao.

Hata hivyo katika baadhi ya uhusiano, kama mwenza mmoja anataka kuvunja uhusiano kutokana na sababu zake, zikiwamo za hisia matokeo yake siku zote huwa mabaya. Wenza wengine wanapotaka kuvunja uhusiano, huwa na tabia ya kukumbuka vitu vyote alivyowekeza katika uhusiano huo awali na hapo atajisikia kuwa yote aliyoyafanya yameenda bure.

Atakuwa anajisikia kuwa mambo yote aliyojitolea kwa miaka mingi, hayakuwa na maana hivyo kukata tamaa na hasira zake kuishia kwa mwenza wake. Kutokana na hali hiyo ya hasira kutawala, mara nyingi hujisahau kuwa hata kwa upande wake yeye anayetaka kukatisha uhusiano huo anaweza kuumia.

Lakini kwa kuwa atakuwa ametawaliwa na mawazo ya kulipiza kisasi, hujikuta akitoa uamuzi ambao baadaye wengi wao hujutia. Hali hii ni maafa katika uhusiano, kwa kuwa inapojitokeza yale yote mazuri katika uhusiano, hupata maumivu ambayo huweza kugeuka kovu la milele.

Ndio maana nabaki na maswali sasa kama unampenda mwenza wako, kwanini umuumize? Kwa maoni na mapendekezo, wasiliana nasi kupitia dimbwimahaba@dailynews-tsn. com au Anwani ya barua pepe hii inalindwa kutokana na spambots. JavaScript lazima iwe itawezeshwa kwa kuweza kuona.