Kilosa yaainisha viwanja 1,970 makazi mapya

HALMASHAURI ya wilaya ya Kilosa, mkoani Morogoro imeainisha viwanja 1,970 vilivyopimwa kwa ajili ya matumizi mbalimbali eneo la makazi mapya vikiwemo vya makazi na biashara, imeelezwa.

Mkurugenzi Mtendaji wa halmashauri ya wilaya ya Kilosa, Idd Mshili, alisema hayo hivi karibuni mjini Kilosa wakati wa ziara ya kikazi ya mkuu wa mkoa wa Morogoro, Dk Rajab Rutengwe.

Alisema , wilaya ya Kilosa ipo katika mpango endelevu wa kuboresha mji wa Kilosa kwa ajili ya kuvutia wageni kuwekeza kwa lengo la kukuza uchumi wa wilaya na wakazi wake. Hivyo alisema, kupitia mpango huo, viwanja vilivyopimwa maeneo ya Mlimani ni viwanja 591, Kondoa 429 na Njia Panda 950 na kufanya idadi yake kufikia 1,970.

Mkurugenzi Mtendaji wa halmashauri hiyo alisema viwanja vya makazi vilivyopimwa eneo la Mlimani ni 541, Kondoa 330 na Njia Panda ni 730 na kufanya idadi ya viwanja vya makazi kuwa ni 1,601.

Kwa upande wa viwanja vya biashara na makazi alisema vilivyopimwa ni 289 kati ya hivyo eneo la Mlimani ni 36, Kondoa 70 na Njia Panda 183. Alijata viwanja vingine vilivyopimwa ni kwa ajili ya ya shule za msingi , majengo ya huduma za umma nyumba za kuabudu , maeneo ya wazi, Mahakama ya mwanzo , Polisi na viwanda vya huduma.

Mkurugenzi mtendaji wa halmashauri hiyo alisema, kupitia mapato ya ndani na ruzuku kutoka Serikali Kuu , wilaya ilitumia Sh 87,388,300 kupima maeneo ya makazi mapya eneo la Kilosa Njia Panda na Kilimani.

Alisema eneo hilo limepitiwa na miundombinu ya reli ya kati na barabara kuu itokayo Dumila hadi Mikumi kupitia Kilosa hadi Morogoro kwa njia ya Melela. “ Eneo hili litakuwa na kituo cha mabasi , vituo vya mafuta , viwanja vya michezo , soko pamoja na jengo la Halmashauri kwa mwaka wa fedha wa 2015/2016” alisema Mkurugenzi mtendaji huyo.