loader
Picha

Majaliwa aguswa TAG inavyomthamini JPM

WAZIRI Mkuu, Kassim Majaliwa amelipongeza Kanisa la Tanzania Assemblies of God kwa kuthamini na kutambua kazi zinazofanywa na Serikali ya Awamu ya Tano.

Ametoa pongezi hizo jana wakati akizungumza na maelfu ya waumini wa kanisa hilo katika Maadhimisho ya Miaka 80 ya TAG hapa nchini yaliyofanyika kwenye uwanja wa Sheikh Amri Abeid, jijini Arusha.

“Baba Askofu Mtokambali umenifurahisha kwa takwimu ulizozitaja hapa za miradi mikubwa ambayo inatekelezwa na serikali hii. Kuna wengine hawapendi kusikia mambo kama haya, hongera sana,” amesema.

Waziri Mkuu ambaye alikuwa mgeni rasmi kwa niaba ya Rais John Magufuli, amesema ameguswa na jinsi kanisa hilo linavyomtambua Rais na wasaidizi wake na kuthamini juhudi za serikali.

“Serikali hii imedhamiria kuwatumikia Watanzania wote bila kujali dini zenu, rangi wala itikadi za kisiasa. Napenda kuwahakikishia kuwa Serikali ya Awamu ya Tano itaendelea kumtegemea Mungu pasipo shaka yoyote.” amesema.

Pia aliwapongeza viongozi wa kanisa hilo kwa mafanikio yaliyopatikana katika kipindi chote cha miaka 80.

“Pia nikupongeze Baba Askofu kwa kuchangia mifuko 1,000 ya saruji kwa ajili ya ujenzi wa shule za sekondari hapa Arusha. Natambua kwamba ulishachangia mifuko mingine 500, asante sana.”

Alilishukuru kanisa hilo kwa kuendesha maombi maalumu kwa ajili ya Taifa yaliyoongozwa na Mchungaji Titus Mkama. “Niliguswa sana wakati maombi ya Taifa yalipokuwa yakiendelea. Mchungaji aligusia masuala ya muhimu kwa Taifa hili.”

Mapema, akimkaribisha Waziri Mkuu kuzungumza na maelfu ya washirika waliohudhuria maadhimisho hayo, Askofu Mkuu wa TAG, Dk Barnabas Mtokambali alisema anamshukuru Rais Magufuli kwa kulipenda na kulijali kanisa hilo.

Alimpongeza Rais Magufuli kwa miradi mikubwa ya maendeleo anayoisimamia kama vile umeme wa Bonde la Mto Rufiji Reli ya SGR, ununuzi wa ndege, ujenzi wa hospitali mpya 67 za wilaya, ujenzi wa vituo vya afya 370 na ununuzi wa dawa za hospitali.

“Nina umri wa kutosha lakini katika miaka yangu yote hii, sijawahi kuona hospitali 67 zikijengwa kwa pamoja. Tena, mwaka huu wa fedha mmetenga hela kwa ajili ya ujenzi wa hospitali nyingine 27. Hongera sana kwa ujasiri huo,” alisema Dk Mtokambali. Maadhimisho ya miaka 80 ya TAG yamekwenda sambamba na hitimisho la miaka 10 ya Mpango Mkakati wa Mavuno.

MTENDAJI wa Kijiji cha Manchali A, Wilaya ya Chamwino mkoani ...

foto
Mwandishi: Mwandishi Maalumu, Arusha

Habari Nyingine

Categories

habari zaidi zinazoendana na hii

mpya # zaidi