Naamka asubuhi,  sioni kilongalonga, 
Napapasa kitandani,  hamadi hiki hapa,  
Nini kimetokea,  naanza kuhabarika, 
Lo!  Mkapa si mwenzetu,  tutaonana baadaye 

Habari yanishtusha,  Mkapa katangulia, 
Natetema kwa Mshtuko,  siamini nionacho, 
Uhakika napata,  Mkuu wa nchi katangaza, 
Lo! Mkapa si mwenzetu, tutaonana baadaye 

Ukweli na uwazi,  hilo alilikazia, 
Kuficha mambo mwiko,  hilo alisitizia,  
Watesi walipoibuka,  msimamo aliushikilia, 
Lo!  Mkapa si mwenzetu,  tutaonana baadaye 

Mkapa umeondoka,  taarifa hukutoa,  
Heshima uliyoacha,  watumishi watakuenzi, 
Uliingia Ikulu,  watumishi wakaheshika, 
Lo!  Mkapa si mwenzetu,  tutaonana baadaye 

Sekta ya elimu, taswira yako ilidhihirika, 
Wengi walirudi darasani, umri haukuwa kigezo, 
Hukutaka waende peku, TASAF ukawanzishia,  
Lo! Mkapa si mwenzetu,  tutaonana baadaye 

Walafi uliwakuta,  sahani wamejijazia, 
Mioyoni walijinenea,  mali ya umma haiumi, 
Mashirika uliyanyoosha,  sahani ukazitupa,  
Lo!  Mkapa si mwenzetu,  tutaonana baadaye 

Uchumi ni alama,  abadani haifutiki, 
Ulishusha mfumuko,  dijiti moja tulifika, 
Ulikunjua makucha,  walafi walipoibuka, 
Lo! Mkapa si mwenzetu,  tutaonana baadaye 

Nyayo zako duniani,  kwetu ramani  ya kivita, 
Lazima tukuenzi,  kupambana na umasikini, 
Kutetea wanaosawijika,  kazi pekee iliyobaki,  
Lo!  Mkapa si mwenzetu,  tutaonana baadaye

Michezoni si kapa, uwanja ulitujengea, 
Vijana hawatakuona,  jina lako watalitaja, 
Wakipitia kumbukumbu,  twasira wataiona, 
Lo! Mkapa si mwenzetu, tutaonana baadaye 

Siendi mbali tena,  Mkapa huishi kusimulika, 
Kimya hakisaidii,  mahasidi wakatamalaki, 
Katuandalie kiamba,  njiani twakufuata, 
Lo! Mkapa si mwenzetu,  tutaonana baadaye

Aliyeandika ni Sauli Giliard, Mkazi wa Mivunoni,  Dar es Salaam.